Pétur Marteinsson, oddviti Samfylkingarinnar í borgarstjórnarkosningunum í Reykjavík, segir að flokkur hans vilji einfalda leyfisveitingakerfi atvinnurekstrar í borginni, þannig að atvinnurekendur þurfi ekki að bíða misserum saman eftir nauðsynlegum leyfum til að hefja rekstur. Þetta er á meðal þess sem fram kemur í spjalli Péturs og Ólafs Stephensen, framkvæmdastjóra Félags atvinnurekenda, í hlaðvarpsþættinum Kaffikróknum hjá FA. Hægt er að horfa á þáttinn í spilaranum hér að neðan.
Pétur vitnar í þættinum í langa reynslu sína af veitingarekstri, en hann hefur opnað nokkra veitingastaði í vestur- og miðbæ Reykjavíkur. „Það eru mjög mörg flækjustig, sem eru skal ég segja þér óþolandi. Maður skilur ekki alltaf hvað hlutir taka langan tíma og manni finnst þeir, sem eru að setja peningana sína í verkefni og taka áhættu, ekki mæta virðingu og skilningi innan kerfisins. Það er ekki spurning um fólkið sjálft, því að fólkið er venjulega mjög gott sem maður er að díla við, en kerfið er dálítið flókið,“ segir Pétur.
Hann rifjar upp þegar hann bjó í Stokkhólmi. Félagi hans vildi opna veitingastað á Södermalm þar í borg og leitaði eftir aðstoð hjá Pétri sem reynslubolta í bransanum. Pétur varaði hann við því að það myndi taka að minnsta kosti hálft ár að fá nauðsynleg leyfi frá byggingafulltrúa, vinnueftirliti, heilbrigðiseftirliti, lögreglu o.s.frv. áður en hægt væri að fara að framkvæma. Félaginn stoppaði hann af og sýndi honum blað, þar sem talið var upp það sem þyrfti að uppfylla til að hefja rekstur – og eftirlitinu væri svo sinnt eftir á og tekið hart á því ef t.d. heilbrigðiskröfur væru ekki uppfylltar. „Það hefur stundum ríkt einhver kerfisleg tortryggni, en við höfum mikinn hug á að breyta þessu bara. Einfalda leyfiskerfið, það er númer eitt, tvö og þrjú,“ segir hann.
Afsláttur af fasteignagjöldum fyrir rekstur á jarðhæðum
Pétur segist þeirrar skoðunar að mögulega hafi verið gengið of langt í kröfum á hendur verktökum að hafa atvinnuhúsnæði á jarðhæðum í nýjum fjölbýlishúsum, en erfiðlega hefur gengið að koma því húsnæði í notkun. „Ég held að það hafi mögulega verið farið aðeins offari og of margir fermetrar settir í þetta,“ segir hann. Pétur segir að stundum séu ekki komnir nægilega margir íbúar í ný hverfi til að þjónusta í þessum rýmum beri sig. „Það þarf kannski að hugsa þetta í stærra samhengi – hvernig mun þetta hverfi þróast? Það þarf kannski að gefa einhvern afslátt af fasteignagjöldum af þessu húsnæði. Ef við erum með kröfu um að þetta verði þjónusta eða verslun þá þarf einhvern veginn að koma til móts við það, því að það er ekki hægt að búast við að Auddi Blöndal opni kaffihús í þessu húsnæði á meðan það er ekkert fólk eða þetta er ennþá í uppbyggingu.“
Lækkun fasteignaskatta ekki á stefnuskránni
Pétur er hins vegar ekki sammála því að fasteignaskattur á atvinnuhúsnæði sé almennt of hár í Reykjavík og það sé farið að fæla fyrirtæki frá borginni. Ennþá sé það svo að fyrirtæki vilji vera í Reykjavík og það sé mikill vöxtur í fyrirtækjarekstri í borginni. Fyrirtækjum hafi fjölgað um 50% á 15 árum og störfum hafi fjölgað um 35% á áratug. Margir aðrir liðir vegi þyngra í rekstri fyrirtækja en húsnæðiskostnaður. Borgin sé enn mjög samkeppnishæf að flestu leyti til að laða að sér atvinnurekstur. Lækkun fasteignaskatta sé ekki á stefnuskránni núna heldur leggi Samfylkingin áherslu á aðra þætti í rekstrarumhverfi fyrirtækja. „Ef þú ert bara með venjulega hagfræði, framboð og eftirspurn, þá er ekkert sem öskrar á að við eigum að lækka þessa prósentu núna, en við hlustum og við viljum að það sé gott að reka fyrirtæki í Reykjavík.“
Vantar upp á samtalið um Suðurlandsbraut
Ólafur spyr Pétur út í óánægju fyrirtækja við Suðurlandsbraut og í Múlahverfi með útfærslu legu Borgarlínu um Suðurlandsbrautina, en þar á m.a. að fækka bílastæðum og fækka akreinum fyrir bílaumferð úr fjórum í tvær. „Við erum tilbúin að skoða hvert einasta skipulag og ég held að það þurfi að hlusta betur á hagsmunaaðila og hafa meira samráð. Að því sögðu, er ekki þar með sagt að hagsmunahópur hér sé með sömu hagsmuni og hópar annars staðar,“ segir hann.
Pétur lýsir skilningi á áhyggjum fyrirtækja við Suðurlandsbrautina af skipulagi framkvæmda við götuna og hver áhrifin verði á aðgengi að fyrirtækjunum. „Það er algjörlega ljóst, sama hvaða flokkar verða við völd, að það þarf að hlusta á þessa hagsmunaaðila á meðan við erum að skipuleggja framkvæmdir,“ segir Pétur og viðurkennir að samtalið við fyrirtækin í hverfinu hafi ekki verið nógu gott. Hann er hins vegar efins um að hægt sé að útfæra Suðurlandsbrautarskipulagið þannig að komist verði hjá því að fækka akreinum fyrir bílaumferð.
