Félag atvinnurekenda fagnar tillögum í frumvarpi atvinnuvegaráðherra til breytinga á lögum um ársreikninga, sem leiða til einföldunar regluverks fyrirtækja. Félagið bendir hins vegar á að einnig er í frumvarpinu að finna gullhúðun Evrópureglna, þ.e. þyngri kvaðir eru lagðar á íslensk fyrirtæki en þær lágmarkskröfur, sem eru gerðar í viðkomandi reglum Evrópska efnahagssvæðisins.
Rýmri stærðarmörk á örfélögum létta reglubyrði
FA fagnar þannig ákvæðum um verulega hækkun stærðarmarka fyrir örfélög, lítil, meðalstór og stór félög og samstæður, allt að 25%, sem kveðið er á um í frumvarpinu. Sú breyting er til samræmis við breyttar reglur Evrópusambandsins, sem hafa verið teknar upp í EES-samninginn. Í umsögn félagsins segir að ánægjulegt sé að sjá að tillaga FA um rýmkun marka fyrir örfélög, sem felur í sér hækkun heildareigna úr 20 millj. kr. í 50 millj. kr. og hreinnar veltu úr 40 millj. kr. í 100 millj. kr., hafi verið tekin til greina. Breytingarnar fela í sér rýmkun á stærðarmörkum þeirra félaga sem geta nýtt sér einföld rafræn skil, með því að vera skilgreind sem örfélög. Stór hluti íslenskra fyrirtækja fellur þar undir.
Í greinargerð með frumvarpinu er áréttað að markmið breytinganna er að tryggja að flokkun félaga samkvæmt ársreikningalögum endurspegli áfram raunverulegt efnahagslegt umfang þeirra og að með þessu verði markmiðinu um einföldun fyrir örfélög náð með skýrari og markvissari afmörkun. Þetta er að mati FA mikilvæg og kærkomin létting á stjórnsýslubyrði fyrir fjölda minni rekstraraðila.
Endurskoðunarskylda minni aðila gullhúðuð
Þrátt fyrir almennar hækkanir á stærðarmörkum, er það engu að síður mat FA að mikilvægum ábendingum félagsins hvað varðar endurskoðunarskyldu minni aðila hafi ekki verið mætt. Félagið ítrekar t.d. þá afstöðu sína að nýtt ákvæði um að félög með heildareignir sem nema a.m.k. 1,5 milljörðum króna falli ekki undir undanþáguheimild frá endurskoðun, sé órökstudd umframkrafa sem gangi lengra en lágmarkskröfur EES-réttar.
„Þetta ákvæði er sýnilegt dæmi um „gullhúðun“ á regluverkinu. Samkvæmt ársreikningatilskipun ESB 2013/34/ESB er aðildarríkjum heimilt að undanþiggja lítil félög endurskoðunarskyldu og eingöngu er gerð krafa um endurskoðun fyrir meðalstór og stór félög. Þótt aðildarríkjum sé heimilt að setja ríkari kröfur en tilskipunin kveður á um, þá er þessi 1,5 milljarða króna viðmiðun, sem þvingar fram endurskoðun á félögum sem að öðru leyti falla undir skilgreiningu lítilla félaga samkvæmt EES-viðmiðum, talin órökstudd umframkrafa. Hún eykur reglubyrði og kostnað á félög sem að öðru leyti teljast ekki stór í alþjóðlegu samhengi,“ segir í umsögn FA.
Fram kemur í greinargerð frumvarpsins að þessari viðbót sé ætlað að koma í veg fyrir að félög sem eru umtalsverð að stærð geti nýtt sér undanþágu frá endurskoðun. FA telur að þetta markmið sé ekki nægjanlegur rökstuðningur fyrir slíkri umframkröfu, sérstaklega þegar litið sé til yfirlýstra markmiða stjórnvalda um einföldun regluverks og samkeppnishæfni. „Krafan getur leitt af sér að íslensk fyrirtæki búi við þyngra regluverk en jafnstór fyrirtæki í öðrum EES-ríkjum, sem augljóslega skekkir samkeppnisstöðu. FA telur brýnt að þetta ákvæði verði endurskoðað,“ segir í umsögn Félags atvinnurekenda.
