Félag atvinnurekenda hefur vísað kjaradeilu sinni við VR og Landssamband íslenzkra verzlunarmanna (LÍV) til ríkissáttasemjara. Að loknum fundi aðila í dag var niðurstaðan sú að báðir myndu vísa deilunni til sáttasemjara.
Gera má ráð fyrir að ríkissáttasemjari muni, að fengnum tilkynningum félaganna, boða aðila „til fundar svo skjótt sem kostur er og halda síðan áfram sáttaumleitunum meðan von er til þess að þær beri árangur“ eins og það er orðað í lögum um stéttarfélög og vinnudeilur.
