Næsta örnámskeið FA fjallar um svokölluð EKKO-mál á vinnustöðum, þ.e.a.s. réttindi og skyldur samkvæmt reglugerð um aðgerðir gegn einelti, kynbundinni áreitni, kynferðislegri áreitni og ofbeldi á vinnustað, nr. 1009/2015. Námskeiðið verður haldið þriðjudaginn 27. maí kl. 10 á Teams og leiðbeinandinn er Unnur Ásta Bergsteinsdóttir, lögmaður hjá MAGNA lögmönnum og sérfræðingur í EKKO-málum.
Fjallað verður um eftirfarandi:
- Lögbundnar skyldur atvinnurekenda í tengslum við félagslega vinnuumhverfið.
- Lágmarkskröfur sem gerðar eru í lögum til viðbragðsáætlana vinnustaðar.
- Hvernig á að bregðast við tilkynningum um einelti, kynbundna áreitni, kynferðislega áreitni eða ofbeldi?
- Á að gera breytingar á starfsumhverfinu meðan mál er til skoðunar?
- Hvenær getur atvinnurekandi orðið skaðabótaskyldur vegna eineltis- eða áreitnismáls á vinnustaðnum?
- Hver á rétt á aðgangi að niðurstöðu í EKKO-máli?
- Viðbrögð þegar niðurstaða liggur fyrir í EKKO máli.
Námskeiðið gagnast öllum stjórnendum og sérstaklega þeim sem sjá um mannauðsmál á vinnustöðum. Félagsmenn FA þekkja orðið örnámskeiðaformið; námskeiðin eru haldin á netinu og taka nákvæmlega 30 mínútur; 20 mínútna fyrirlestur og 10 mínútur í spurningar og svör.
Skráning er hér að neðan. Skráðir félagsmenn fá sendan hlekk til þátttöku með góðum fyrirvara.
