Einar Þorsteinsson, oddviti Framsóknarflokksins fyrir borgarstjórnarkosningarnar, segir að bæta þurfi viðhorf og þjónustulund Reykjavíkurborgar gagnvart atvinnulífinu. Einar vill til dæmis að hlustað verði á raddir fyrirtækja í nágrenni Suðurlandsbrautar og fallið frá áformum um fækkun akreina fyrir bílaumferð. Þetta kemur fram í viðtali Ólafs Stephensen, framkvæmdastjóra Félags atvinnurekenda, við Einar í Hlaðvarpsþættinum Kaffikróknum.
Helmingur taldi sig ekki í þjónustuhlutverki
Einar rifjar í viðtalinu upp að þegar hann var borgarstjóri í rúmlega ár fyrr á kjörtímabilinu hafi hann viljað skilgreina atvinnulífið betur sem hagsmunaaðila við töku ýmissa ákvarðana. Hann nefnir þrengingu á gatnamótum Kleppsmýrarvegar og Sæbrautar, þar sem hann segir hafa gleymst að ræða við fyrirtækin á svæðinu áður en farið var í framkvæmdir. „Ég held það sé ákveðinn kerfisbundinn vandi og viðhorfsvandi hjá Reykjavíkurborg að horfa á atvinnulífið sem grundvallarþátt í því að við getum átt hér öflugt og farsælt samfélag, segir hann.
Einar segir sögu af fundi með um 600 stjórnendum hjá borginni, þar sem rætt var um „þjónustuborgina“. „Svo stóð ég þarna og spurði: Mig langar að kanna hvernig viðhorfið er hjá ykkur í salnum, hversu margir af ykkur, sem eruð stjórnendur hjá borginni, lítið svo á að þið hafið þjónustuhlutverki að gegna? Ég rétti upp hönd og helmingurinn af salnum rétti upp hönd, en hinn helmingurinn ekki. Ég náttúrlega benti helmingnum, sem ekki rétti upp hönd, á að þau hefðu rangt fyrir sér, því að við erum öll með þjónustuhlutverk á okkar herðum, sem vinnum hjá borginni. Þetta er þjónustustofnun. Þótt þjónustustefnan sé góð, þarf að ráðast í að breyta menningunni ef hún er ekki rétt.“
Hægt að sníða vankanta af skipulaginu á Suðurlandsbraut
Ólafur spyr hvort Einar muni beita sér fyrir breytingu á nýsamþykktu deiliskipulagi með útfærslu Borgarlínu um Suðurlandsbraut og hann svarar því eindregið játandi. Einar segir að Framsóknarflokkurinn sé á miðjunni í samgöngumálunum; á annan bóginn séu Sjálfstæðis- og Miðflokkur, sem vilji hætta við Borgarlínu og setja allt á byrjunarreit, og á hinn bóginn Samfylking, Viðreisn og flokkar á vinstri vængnum, sem ætli ekki að hlusta á neina gagnrýni á planið. „Auðvitað sjáum við að það er hægt að sníða af þessu vankantana. Það er alveg hægt að vera með einn hjólastíg öðru hvoru megin og leyfa þá bílastæðunum að lifa, allavega eitthvað lengur, á meðan við göngum til samninga við fyrirtækjaeigendur um að þeir fái gatnagerðargjöld felld niður eða 90% afslátt til að byggja bílastæðahús á bak við húsin sín eða mætum þeim einhvers staðar, búum til eitthvert samtal.“
Einar segir að allir sjái að eigi að loka Suðurlandsbrautinni í mörg ár vegna framkvæmda, fari fyrirtækin bara á hausinn eða fari eitthvert annað. „Við eigum að mæta þörfum fólks en ekki reyna stanslaust að breyta þeim. Ég tengi ekkert við að hlusta ekki á gagnrýni. Við munum taka mið af henni og munum breyta þessu skipulagi,“ segir hann.
Fasteignaskattar á atvinnuhúsnæði lækki
Einar segist vilja lækka fasteignaskatta á atvinnuhúsnæði samhliða hagræðingu í rekstri borgarinnar. „Þegar fyrirtækin og heimilin eru að herða sultarólina á borgin ekki að losa beltið, en það er hún að gera,“ segir hann. Slík skattalækkun sé einnig þáttur í að viðhalda samkeppnishæfni borgarinnar gagnvart nágrannasveitarfélögum.
Fyrirtækjaleikskólar og sveigjanlegur vistunartími
Einar rifjar upp að hann hafi haft frumkvæði að því að leitað væri samstarfs við fyrirtæki um vinnustaðaleikskóla, þar sem helmingurinn væri börn starfsmanna viðkomandi fyrirtækis en hinn helmingurinn úr hverfinu. Þessu hefði verið vel tekið en núverandi meirihluti hefði slátrað hugmyndinni. „Ég veit að það er mikill áhugi hjá atvinnulífinu að koma inn í þetta, því að borgin borgar rekstrarframlag með hverju barni, en fyrirtækin leggja inn í þetta líka þannig að þetta er samvinnuleið.“
Ólafur spyr hvort ekki verði að tryggja börnum vistunartíma, sem tryggi að foreldrar geti verið í fullri vinnu og Einar segist hafa áhyggjur af að umræðan hjá sveitarfélögum snúist meira og minna um það hvernig væri hægt að skerða þjónustu við foreldra með sem þægilegustum hætti fyrir alla. Væntingar fjölskyldna og atvinnulífs annars vegar og leikskólakennara hins vegar fari ekki saman. „Ég held að fólk þarna úti, sem er að kjósa, vilji bara fá möguleikann á að fá heils dags þjónustu,“ segir hann og segir Framsókn munu leggja áherslu á fjölbreyttar lausnir og sveigjanleika, t.d. að leikskólavist geti hafist seinna að deginum og börnin séu þá líka sótt síðar, sem geti t.d. hentað vaktavinnufólki.
