Ari Edwald, oddviti Miðflokksins fyrir borgarstjórnarkosningarnar, segir skipulagsstefnu Reykjavíkurborgar vera meiriháttar verðbólguvald. Þetta kemur fram í viðtali við Ara í Kaffikróknum, hlaðvarpsþætti Félags atvinnurekenda, en þar ræðir Ólafur Stephensen framkvæmdastjóri FA við oddvita helstu framboða fyrir borgarstjórnarkosningarnar um stefnu þeirra í málefnum atvinnulífs og fyrirtækja í borginni. Hægt er að horfa á þáttinn í spilaranum hér að neðan og hlusta á Spotify.
„Það er mikið rætt núna um starfsumhverfi atvinnulífs og verðbólguna. Ég tel að Reykjavíkurborg beri miklu meiri ábyrgð á því að kynda undir aukinni verðbólgu heldur en hefur verið greint,“ segir Ari í viðtalinu. Hann vísar meðal annars í samning sveitarfélaganna á höfuðborgarsvæðinu frá 2015 um vaxtarmörk, sem er hluti af svæðisskipulagi höfuðborgarsvæðisins. Ari gagnrýnir að vaxtarmörkin gildi í 25 ár, því að augljóst sé að þau þurfi endurskoðunar við.
Verður að rýmka byggðina
„Þetta stuðlar, eins og allir átta sig á, að hækkun lóðaverðs og að lóðakostnaður sé orðinn 200 þúsund krónur á fermetrann,“ Hann segir að annað sem stuðli að hækkun húsnæðisverðs sé síðan tilhneiging borgarinnar til að ýta öðrum gjöldum yfir á íbúðarkaupendur, til dæmis innviðagjöldum, og kvaðir um að 35% íbúða séu félagslegar og seldar á miklum afslætti, en það leggist á aðra íbúðareigendur. Vaxtarmörkin þýði að þéttni í nýjum hverfum sé orðin alltof mikil. Það sé hins vegar nóg pláss til að víkka út mörkin og brjóta nýtt land.
„Allar götur frá því að þessi samningur um vaxtarmörk var gerður hefur húsnæðisverð leitt verðbólguna í níu verðbólgumælingum af hverjum tíu. Allan þennan áratug. Menn segja: Það er út um allt, ekki bara í Reykjavík. Nei. Meðalverðið var 89.000 krónum hærra í Reykjavík árið 2015 en en er núna tæplega 190 þúsund krónum hærra en í sveitarfélögum annars staðar,“ segir Ari. „Það er augljóst að það er algjör grundvallarforsenda, til að slaka á þessum verðbólgubelg og hleypa loftinu úr þessari ófreskju, að slaka á þessu og rýmka byggðina.“
Kjarabætur teknar til baka með umferðartöfum
Ari og Ólafur eru sammála um að þegar auknar umferðartafir í borginni og styttri vistunartími barna á leikskólum komi saman, valdi það streitu hjá foreldrum og reyni á þolinmæði vinnuveitenda. Ari bendir á að í borgum víða um lönd sé litið á ferðatíma innan borga sem mælikvarða á gæði starfsumhverfis. „Það er auðvitað ömurlegt ef mjög stór hluti af vinnutímastyttingu fólks er tekinn til baka í umferðartöfum. Alveg eins og maður talar um samkeppnishæf laun, sem eru laun eftir skatt, það sem þú færð í vasann, þá er auðvitað vinnutíminn sá tími, sem það tekur þig að inna vinnuna af hendi. Frá því að þú þarft að leggja af stað […] og þangað til þú ert kominn til baka. Verkalýðshreyfingin er alveg hljóð yfir þessu og hefur ekki sagt múkk þótt það sé kannski verið að taka kjaraávinning launafólks til nokkurra ára til baka í gegnum þetta.“
Suðurlandsbrautar-óskapnaðurinn mun ekki ganga eftir
Ólafur spurði Ara hvort áformum um fækkun akreina á Suðurlandsbraut samhliða lagningu Borgarlínu yrði breytt, kæmist Miðflokkurinn í meirihluta. FA og félagsmenn þess á svæðinu hafa látið í ljós miklar áhyggjur af útfærslu Borgarlínu um Suðurlandsbraut en fengið lítinn hljómgrunn hjá borgaryfirvöldum. Ari segir stefnu Miðflokksins að falla frá Borgarlínunni en gera aðrar umbætur í almenningssamgöngum. „Ég hef enga trú á að þessi óskapnaður á Suðurlandsbrautinni nái fram að ganga,“ segir Ari en segir að áformin séu hluti af skeytingarleysi borgaryfirvalda gagnvart atvinnulífinu. Á svæðinu starfi um 5.000 starfsmenn og umsvif fyrirtækjanna séu á við 3-4 álver. „Samt er bara keyrt áfram á því að þarna eigi bara að vera nánast lokað í fimm ár að minnsta kosti.“
Fasteignaskattur á atvinnuhúsnæði lækki
Miðflokkurinn segist í kosningastefnu sinni vilja lækka fasteignaskatta. Fasteignaskattur á atvinnuhúsnæði í Reykjavík er nú 1,6%, miðað við t.d. 1,39% í Kópavogi og 1,367% í Hafnarfirði. Ari segist ekki vilja nefna nákvæma tölu sem skatturinn ætti að lækka í, en ljóst sé að mikil óráðsía sé í rekstri borgarinnar og eftir miklu að slægjast að hagræða í honum og bæta þjónustu við fólk og fyrirtæki.
