„Endahnútur“ Ólafs Stephensen framkvæmdastjóra FA í Viðskiptablaðinu 10. júní 2026.
Hver sem niðurstaða þjóðarinnar verður um áframhaldandi aðildarviðræður við Evrópusambandið, má ekki missa fókus á tvö verkefni, sem tengjast Evrópuregluverkinu sem við höfum samið um að taka upp í gegnum EES-samninginn.
Annars vegar vinnur Evrópusambandið nú að umfangsmikilli einföldun regluverks í kjölfar Draghi-skýrslunnar svokölluðu. Markmiðið er að létta regluverk atvinnulífsins um 25% – og meira hjá minni og meðalstórum fyrirtækjum, eða 35%. Mikið af einföldunar-„bandormunum“, sem breyta mörgum lagabálkum í einu og eru nú til meðferðar hjá stofnunum ESB, verður tekið upp í EES-samninginn og mun gilda líka á Íslandi.
Það skiptir gífurlega miklu máli að þessar einfölduðu reglur eigi greiða leið inn í íslenzka löggjöf. Félag atvinnurekenda og Íslensk-evrópska verslunarráðið hafa beitt sér í málinu og það er fagnaðarefni að í aðgerðaáætlun atvinnustefnu fyrir Ísland, sem var birt í apríl, var tekin upp í fyrstu aðgerð sú tillaga samtakanna að veita þessum einfölduðu reglum forgang þegar kemur að upptöku í EES-samninginn og innleiðingu hér á landi.
Hitt málið, sem þarf að taka föstum tökum, er að vinna gegn gullhúðun Evrópuregluverksins, sem er heimatilbúið íslenzkt vandamál. Ríkisstjórnin er með skýra stefnu um að forðast gullhúðun og einfalda regluverk, en framkvæmdin virðist vefjast fyrir fagráðuneytum, eins og nýlegt dæmi af gullhúðun peningaþvættislöggjafar EES gagnvart bíla-, véla- og tækjasölum sýnir. Á þessi fyrirtæki eru lagðar kvaðir sem útheimta ærna skriffinnsku, umstang og kostnað, bæði fyrir fyrirtækin og viðskiptavini þeirra. Sambærileg fyrirtæki í öðrum EES-ríkjum bera ekki sömu skyldur. Þrátt fyrir það er djúpt á skýrum svörum frá dómsmálaráðuneytinu við spurningum um hvort undið verði ofan af gullhúðuninni.
Hver sem Evrópuvegferðin verður, má ekki missa fókus á þessi verkefni. Stjórnvöld verða að fylgja einföldun og afhúðun fast eftir, í þágu betri rekstrarskilyrða fyrirtækjanna.
