Forsvarsmenn Félags atvinnurekenda og Íslensk-evrópska verslunarráðsins (ÍEV) áttu árangursríka fundi með framkvæmdastjórn Evrópusambandsins, Eftirlitsstofnun EFTA (ESA) og íslenska sendiráðinu í Brussel í byrjun vikunnar.
Meðal umræðuefnanna voru ýmis mikilvæg hagsmunamál félagsmanna FA og ÍEV sem hafa verið í deiglunni undanfarin misseri, svo sem tollflokkun á pitsuosti, Evrópureglur um merkingar á einnota plastvörum, einföldun regluverks atvinnulífsins, fyrirkomulag á úthlutun ESB-tollkvóta, viðræður um aukna fríverslun með sjávarafurðir og búvörur milli Íslands og ESB og mögulega beitingu Evrópusambandsins á verndartollum gagnvart Íslandi.
Mikilvægt að dýpka tengslin
„Það er mikilvægt að dýpka þau góðu tengsl við stofnanir EFTA og Evrópusambandsins, sem við höfum skapað eftir stofnun Íslensk-evrópska verslunarráðsins árið 2017 og hafa nýst bæði félagsmönnum FA og ÍEV,“ segir Ólafur Stephensen framkvæmdastjóri FA og ÍEV. „Við fylgdum eftir ýmsum málum sem við höfum verið í samskiptum við þessar stofnanir um. Það var ánægjulegt að heyra hversu djúpa þekkingu embættismenn framkvæmdastjórnarinnar hafa t.d. á tollflokkunarmálinu, enda er þar um að ræða prinsippmál sem verður að leysa úr, annars er búið að skapa fordæmi fyrir því að íslensk stjórnvöld geti brotið gegn alþjóðlegum tollflokkunarreglum og EES-samningnum í þágu sérhagsmuna. Þá var ánægjulegt að fá skýrt fram sameiginlegan skilning á því að íslenskum stjórnvöldum væri óheimilt að leggja tolla á vöruna eftir að hún hefur verið rétt tollflokkuð í kafla 21 í tollskrá. Sömuleiðis var áhugavert að heyra að framkvæmdastjórnin hefur augljóslega góðan skilning á því að fyrirkomulag íslenskra stjórnvalda á úthlutun tollkvóta fyrir búvörur frá ESB brýtur gegn tvíhliða samkomulagi Íslands og ESB frá 2015 um fríverslun með búvörur.“
Ólafur segir að einnig hafi verið mikilvægt að fylgja eftir milliliðalaust gagnvart ESB málum sem varði EES-samninginn og samtökin hafi átt í samskiptum við íslensk stjórnvöld um, til dæmis reglur um merkingar á einnota plastvörum, en FA hefur bent á að verði þær reglur innleiddar óbreyttar í íslenskan rétt muni það skerða samkeppni og hækka verð á umræddum vörum. „Þá nýttum við einnig tækifærið til að benda framkvæmdastjórninni og ESA á hnökra sem orðið hafa á frjálsu flæði CE-merktra byggingarvara og einingahúsa til Íslands, þar sem innlend stjórnvöld hafa ranglega talið það hlutverk sitt að endurskoða vottun þeirra.“
Einföldun regluverks stendur fyrir dyrum
„Við ræddum talsvert við embættismenn framkvæmdastjórnarinnar og ESA um þá einföldun regluverks Evrópusambandsins sem nú stendur fyrir dyrum í kjölfar Draghi-skýrslunnar um samkeppnishæfni Evrópu. Þegar sú einföldun byrjar að skila sér yfir í EES-samninginn skiptir miklu að innleiðing léttara regluverks í íslensk lög gangi hratt fyrir sig þannig að Íslensk fyrirtæki búi ekki við meira íþyngjandi reglur en sambærileg fyrirtæki í ESB,“ segir Páll Rúnar Kristjánsson, formaður ÍEV. Hann leggur áherslu á að aflétting íþyngjandi reglna þurfi að vera forgangsmál hjá íslenskum stjórnvöldum. „Þetta ferli þarf að eiga sér stað um leið og íslensk stjórnvöld standa við þau fyrirheit að aflétta þeirri gullhúðun Evrópureglna, sem hefur víða átt sér stað á undanförnum árum. Ef rétt er á málum haldið, getur þetta skilað sér í verulegri einföldun regluverks íslensks atvinnulífs.“
Páll segir að FA og ÍEV muni beita sér fyrir því á næstunni að kynna fyrir íslensku atvinnulífi hvers sé að vænta varðandi einföldun regluverks ESB og hvernig það hafi áhrif á EES-samninginn.
