Hildur Björnsdóttir, oddviti Sjálfstæðisflokksins í borgarstjórn Reykjavíkur, segir að fækka þurfi starfsfólki í stjórnsýslu borgarinnar og ná stærðarhagkvæmni, sem borgin njóti ekki í dag. Sjálfstæðismenn vilja útvista fjölda verkefna borgarinnar, til dæmis sorphirðu, og einkavæða Malbikunarstöðina Höfða, Carbfix og Ljósleiðarann. Þetta kemur fram í viðtali Ólafs Stephensen, framkvæmdastjóra Félags atvinnurekenda, við Hildi í hlaðvarpsþættinum Kaffikróknum. Hægt er að horfa á þáttinn í spilaranum hér að neðan.
Borgin nýtur ekki stærðarhagkvæmni
Hildur tekur í viðtalinu undir að starfsmönnum borgarinnar hafi fjölgað of hratt og rifjar upp ábendingu fjármála- og áhættustýringarsviðs borgarinnar vegna fjárhagsáætlunar, um að á fimm ára tímabili hefði borgarstarfsmönnum fjölgað um 25% en íbúum Reykjavíkur aðeins um 10%. Þetta væri ósjálfbær þróun og vinda yrði ofan af henni.
„Þá erum við ekkert að tala um að það vinni of margir í leikskólum, þjónustu við fatlaða eða heimahjúkrun við aldraða. Það er ekki það, það er þessi yfirbygging. Ef við gerum samanburð á stjórnsýslukostnaði Reykjavíkur og nágrannasveitarfélaga er hann langhæstur í Reykjavík, við erum með flesta starfsmenn á íbúa og erum ekki að njóta neinnar stærðarhagkvæmni. Þetta eru skýrir mælikvarðar á að það er eitthvað að í kerfinu. Það eru of margir millistjórnendur og of margir í þessu stjórnunarlagi í Ráðhúsinu og í Borgartúninu. Það er þar sem við þurfum að skera niður,“ segir Hildur.
Borgin selji samkeppnisrekstur og útvisti verkefnum
Hildur segir að borgin eigi almennt ekki að standa í samkeppnisrekstri eins og Malbikunarstöðin Höfði og Ljósleiðarinn eru. „Reykvíkingar eru í dag á vettvangi Ljósleiðarans að fjárfesta heilmiklu fé í ljósleiðaratengingum í sveitarfélögum um landið allt og það er ekki hlutverk Reykvíkinga. Ljósleiðarinn hefur verið rekinn með tapi og við viljum bara losna undan þessu. Hjá Carbfix er ótrúlega spennandi tækni og frábærir vísindamenn sem þar starfa, en þetta er ekki eðlilegt kjarnahlutverk Orkuveitunnar,“ segir Hildur.
Hún vill útvista fjölda verkefna hjá borginni, til dæmis sorphirðu, sem um 100 manns starfa við, og bendir á að Reykjavík sé eina sveitarfélagið á höfuðborgarsvæðinu sem ekki útvisti sorphirðu, en minni ánægja sé með þjónustuna í Reykjavík en nágrannasveitarfélögum.
Hið opinbera á ekki að vera leiðandi í launaþróun
Hildur nefnir að 100-200 manns hafi starfað við stafræna umbreytingu Reykjavíkur. 10 milljörðum króna, sem var varið til verkefnisins, hafi verið eytt án þess að af því sjáist einhver byltingarkenndur árangur. „Borgin hefur verið í samkeppni við einkamarkaðinn um fágæta starfsmenn sem mikil samkeppni er um, fólk með verkfræði-, tækni- og tölvunarfræðiþekkingu og hönnuði og er að yfirbjóða einkamarkaðinn. Ég þekki mörg dæmi þess að fólki hafi boðist starf í einkageiranum og hjá borginni á þessum vettvangi. Það valdi að vinna hjá borginni af því að launin eru betri, vinnutíminn þægilegri, stytt vinnuvika og enginn að ónáða þig um helgar. Miklu þægilegra umhverfi. Hið opinbera á ekki að vera leiðandi í launaþróun.“
Hún segir að jafnframt séu tækifæri til að nýta gervigreindina til að fækka starfsfólki. „Við getum skorið verulega niður á þessu sviði, sem sér um stafrænu málin, ef við nýtum okkur gervigreindina rétt.“
Vilja lækka fasteignaskatta og fjölga atvinnulóðum
Hildur boðar að fasteignaskattar á atvinnuhúsnæði verði lækkaðir ef sjálfstæðismenn komast í meirihluta, en það muni þó ekki gerast á fyrstu 12 mánuðunum eftir kosningar. Sjálfstæðismenn vilji hagstætt skattaumhverfi. „Við viljum bregðast við fasteignamatshækkunum og lækka álagningarhlutfallið til samræmis, því að það kostar borgina ekki meira að þjónusta fasteignaeigendur þótt fasteignamat hækki. Svo viljum við saxa á hlutfallið eftir því sem árin líða og vinna okkur í átt að því, en við þurfum auðvitað að bæta reksturinn fyrst,“ segir hún.
Mikil tækifæri eru í því fólgin að mati Hildar að fjölga atvinnulóðum austarlega í borginni og jafna þannig borgarskipulagið, þannig að meginumferðarstraumurinn sé ekki í vesturátt á morgnana og aftur til austurs að kvöldi. Hún segir að sjálfstæðismenn vilji gera fleirum kleift að búa nálægt vinnustað þannig að fólk geti jafnvel gengið í vinnuna.
Vinnustaðaleikskólar draga úr umferðarvanda
Að mati Hildar hefur Reykjavíkurborg gefist upp fyrir verkefninu í leikskólamálum, sem sé að veita heils dags þjónustu fyrir fjölskyldur í Reykjavík, og þess í stað skert þjónustuna. Hún boðar fjölbreyttar lausnir og aukinn sveigjanleika; til dæmis dagheimili fyrir yngstu börnin og samstarf við fyrirtæki um vinnustaðaleikskóla. „Kosturinn er að vinnustaðir geta þá stillt vistunartímann í samræmi við vinnutíma foreldra. Foreldrar geta þurft að fara hálftíma til klukkutíma fyrr úr vinnu til að sækja börn í leikskóla á réttum tíma. Ef barn og foreldri fara á sama stað að morgni og frá sama stað síðdegis skapar það mikið hagræði bæði fyrir fjölskylduna og vinnustaðinn.“
Suðurlandsbrautarskipulagi verði breytt
Hildur segir að Sjálfstæðisflokkurinn muni breyta deiliskipulaginu á Suðurlandsbraut, sem atvinnurekendur á svæðinu hafa andmælt harðlega. „Ef þú skoðar þversniðið af Suðurlandsbrautinni, hvernig þetta á að líta út eftir breytingar, þá sjáum við að það er gert ráð fyrir rosalega miklu plássi fyrir til að mynda Borgarlínu. Það er gert ráð fyrir tveimur tvöföldum hjólastígum sitt hvoru megin við brautina. Þannig að það er eitt og annað sem er hægt að breyta til þess að þetta taki allt saman minna pláss, án þess að við séum að taka akreinar af umferðinni og bílastæði. Svo er auðvitað líka pláss norðan megin við brautina til að koma fyrir sérakreinum. Ég er ekki verkfræðingur, en ég myndi vilja sjá okkar færustu verkfræðinga fara til baka með þessar teikningar og koma með aðra lausn, sem er vinveittari atvinnulífinu á Suðurlandsbrautinni.“
