Björg Magnúsdóttir, oddviti Viðreisnar fyrir borgarstjórnarkosningarnar, segir að Reykjavíkurleiðin svokallaða í leikskólamálum, með styttingu vistunartíma og minni þjónustu, sé andstæð hagsmunum atvinnulífs og foreldra. Viðreisn vilji sveigjanlegra kerfi og ganga til samstarfs við fyrirtæki um vinnustaðaleikskóla. Í viðtali við Ólaf Stephensen, framkvæmdastjóri Félags atvinnurekenda, í hlaðvarpsþættinum Kaffikróknum, segir Björg að góð reynsla sé af rekstri sjálfstæðra leikskóla í borginni og sjálfsagt að fleiri taki þátt í að leysa leikskólavandann. Hægt er að horfa á þáttinn í spilaranum hér að neðan.
Fólk á að hafa frelsi til að vinna
„Reykjavíkurleiðin í leikskólum styður ekki vinnandi foreldra. Það er stóra vandamálið við hana,“ segir Björg. „Ef við viljum taka eitt verkefni og vinna það vel út frá jafnréttismálum er það að tryggja að við höfum leikskólakerfi þar sem foreldrar, mæður jafnt sem feður, hafi frelsi til að vinna. Það er algjör lykilhugsun og með henni var leikskólakerfinu komið á fót í Reykjavík.“
Björg vill meiri sveigjanleika innan kerfisins og minni miðstýringu, þannig að til dæmis sé auðveldara að mæta vaktavinnu og mismunandi vinnutíma foreldra. Eitthvað af því megi gerast með því að vinnustaðir gangi til samstarfs við borgina um vinnustaðaleikskóla. „Þetta er samfélagslegt mál og auðvitað er hagur atvinnulífsins að leysa þetta. Ef fleiri vilja koma að því þá eigum við auðvitað að fara í það,“ segir hún. Hún segir Viðreisn vilja ýta undir rekstur sjálfstæðra leikskóla, sem hafi reynst vel. „Þótt borgin eigi erfitt með að græja þessi leikskólamál er ekki þar með sagt að allir aðrir eigi í veseni með að græja þau.“
Áfallastreituröskun eftir samskipti við borgarkerfið
Björg segist í viðtalinu taka undir að þjónusta borgarinnar við atvinnulífið sé orðin alltof flókin og svifasein og einkennist af tortryggni í stað þjónustulundar. Hún segist sjá „áfallastreituröskun í mannsmynd“ þegar hún ræðir við fólk sem hefur t.d. þurft að hafa samskipti við borgarkerfið vegna stofnunar veitingastaðar eða kaffihúss. Það þurfi að einfalda borgarkerfið og tryggja að það aðstoði atvinnurekendur, í stað þess að leggja stein í götu þeirra.
Björg segir að það eigi að vera auðvelt og skemmtilegt að stofna fyrirtæki í Reykjavík og bendir á að í fjórum af sex efstu sætunum hjá Viðreisn starfi fólk sem hafi reynslu af stofnun og rekstri fyrirtækja, stórra og smárra, íslenskra og alþjóðlegra. Hún tekur undir að slíkt fólk hafi vantað í borgarstjórn Reykjavíkur. „Praktísk reynsla er algjör lykill inn í þessi störf, því að þá hefurðu bara betri skilning á því hvar flækjurnar liggja og hvernig við lögum þær,“ segir hún.
Borgin verður að bjóða betur
Björg segir að lækkun fasteignaskatta á atvinnuhúsnæði verði sett í forgang ef Viðreisn kemst í meirihluta. Fjárhagur borgarinnar sé hins vegar þaninn og innviðaskuld borgarinnar líklega á þriðja tug milljarða. „Það er ekki ábyrgt að tala um að við ætlum að lækka þetta allt strax. Það er einfaldlega ekki svigrúm til þess núna. En ef vel gengur á kjörtímabilinu að ná tökum á kerfinu – við viljum minnka báknið og draga niður í löngum skipuritum – þá er eitt af okkar markmiðum að geta lækkað fasteignaskattinn á atvinnulífið.“
Björg segist hafa áhyggjur af flótta stöndugra fyrirtækja í önnur sveitarfélög á höfuðborgarsvæðinu. „Ef þessi fyrirtæki eru að kjósa með fótunum og fara eitthvert annað er það ofsalega slæmt fyrir borgina. Þannig að við verðum einfaldlega að bjóða betur.“
Björg tekur undir að gera þurfi vorhreingerningu í borgarkerfinu og fækka fólki. „Ég held að borgarbúar finni mjög fyrir vextinum á kerfinu en finni ekki mjög fyrir vexti í þjónustunni. Það er ofsalega slæmt,“ segir Björg og setur þessa þróun í samhengi við dvínandi traust til borgarstjórnar, sem mælist nú um 13%.
Þarf að gera vel við Suðurlandsbraut
Björg segir að ný borgarstjórn verði að endurskoða deiliskipulag Borgarlínu um Suðurlandsbraut og eiga samtal við fyrirtækin í hverfinu. Hún segir framkvæmdir samkvæmt Samgöngusáttmála höfuðborgarsvæðisins brýnar, en útfærslan skipti máli. Erfitt sé að fara í svona umfangsmikla framkvæmd þegar traustið til borgaryfirvalda hjá fyrirtækjaeigendum sé lítið og sporin hræði, til dæmis reynslan af framkvæmdum við Hverfisgötu og Vatnsstíg. „Þetta er fyrsti stóri parturinn af þessum samgöngusáttmála og borgarlínuhugsuninni og mér finnst skipta mjög miklu máli að við gerum þetta vel, af því að það mun hafa áhrif á verkefnið næsta áratuginn. Þetta er bara samtal og ég hlakka til að mæta fyrirtækjaeigendum og ræða hvernig við gerum þetta saman,“ segir Björg.
