FA og RSÍ gera nýjan kjarasamning

Samningur FA RSÍ 250116
Ólafur Stephensen, framkvæmdastjóri FA, og Kristján Þórður Snæbjarnarson, formaður RSÍ, undirrita kjarasamninginn.

Félag atvinnurekenda og Rafiðnaðarsamband Íslands undirrituðu í dag nýjan kjarasamning. Hann er í öllum aðalatriðum samhljóða þeim samningi sem Samtök atvinnulífsins og Alþýðusamband Íslands undirrituðu í síðustu viku á grundvelli SALEK-samkomulagsins svokallaða.

Samkvæmt samningnum hækka laun meira en áður hafði verið samið um til að tryggja sambærilega launaþróun á öllum vinnumarkaðnum. Launaþróunartrygging fyrir árið 2016 fellur brott. Í stað hennar kemur 6,2% almenn launahækkun þann 1. janúar 2016, að lágmarki kr. 15.000 á mánaðarlaun fyrir dagvinnu.

Ákvæði um launaþróunartryggingu eða „baksýnisspegil“ eins og samið var um í samningi FA og RSÍ í september síðastliðnum falla því út, þó með þeirri undantekningu að launagreiðanda er heimilt að draga frá umsaminni launahækkun á árinu 2016 ótilkynnta almenna hækkun launa starfsmanna sem framkvæmd hefur verið eftir gildistöku kjarasamninga viðkomandi aðildarsamtaka á árinu 2015 og fram að undirskrift nýja samningsins, hafi hún náð til þorra starfsmanna í fyrirtækinu. Þó skal enginn starfsmaður fá minna en 6,2% launahækkun, að lágmarki kr. 15.000 á mánaðarlaun fyrir dagvinnu, á tímabilinu 2. maí til 31. desember 2015.

Hinn 1. maí á næsta ári verður almenn launahækkun 4,5% í stað 3% og í maí 2018 verður almenn launahækkun 3% í stað 2%.

Þá hækkar framlag vinnuveitenda í lífeyrissjóð samkvæmt samningnum, um 0,5% frá 1. júlí næstkomandi, um 1,5% til viðbótar frá 1. júlí 2017 og enn um 1,5% frá 1. júlí 2018, eða samtals um 3,5 prósentustig. Framlag launagreiðanda í lífeyrissjóð verður þá orðið 11,5%.

Sambærilegur samningur hefur þegar verið gerður við VR og stefnt er að undirritun samnings við Grafíu í vikunni. Samningarnir verða bornir undir stjórn FA eins og lög félagsins gera ráð fyrir og kynntir á félagsfundi.

Samningur FA og RSÍ 25. janúar 2016

Deila
Tísta
Deila
Senda